Татарстанда Алдынгылар төбәк Советы рәисен сайлаулар узды. Бу Россиядә балалар үзидарә органы төбәк дәрәҗәсендә үз эшен башлаган беренче тәҗрибә булды. Тавыш бирү ике этапта үтте. Турыдан-туры сайлауда 21 000 укучы катнашты. Аны бөтен Татарстан балалары һәм яшүсмерләре җәлеп ителгән олылар сайлауларының тулы күләмдәге моделе (агитация кампаниясе, дебатлар, сайлау штаблары һәм башкалар) булды, дип әйтергә була. Финалга ике Казан укучысы: Камилла Нуруллина һәм Ислам Гаврилов чыкты. Алар өчен тавыш бирү «Мин – укучы» онлайн-платформасында узды. Татарстанда Алдынгылар хәрәкәтенең балалар үзидарә органы рәисе итеп Камилла Нуруллина билгеләнде.

2500 бала республиканың фәнни һәм мәдәни-тарихи үзәкләрен өйрәнде, шәхсән илебезнең күренекле галимнәре белән танышты, фәнни-тикшеренү оешмалары, югары уку йортлары, оешмалар, музейлар, көллиятләр буенча экскурсияләрдә булды һәм тематик остаханәләрдә катнашты. Проект Татарстанның 35 районын колачлады.

Автобус туры командасы 11 000 километрдан артык юл үтте һәм Татарстанның барлык 45 районында булды. Укучылар һәм көллият студентлары интерактив уеннарда, флешмобларда катнаштылар, Алдынгылар хәрәкәтенең юнәлешләре белән таныштылар һәм күчмә почтада хатлар калдырдылар.

Казанда беренче мәртәбә балалар һәм яшьләр өчен Бөтенроссия «Алдынгылар уеннары» фиджитал-турниры узды. Фиджитал-спорт ярышларында көч сынашырга Россиянең 23 төбәгеннән 602 укучы һәм студент килде. Ярыш нәтиҗәләре буенча Татарстан районнарында балалар һәм яшьләр өчен фиджитал-лига эшли башлады. Ноябрьдә фиджитал-ярышлар республиканың җиде районында: Кама Тамагы, Алабуга, Арча, Бөгелмә, Чүпрәле, Казан һәм Чаллыда үткәрелде. Анда 720 яшь татарстанлы катнашты.

5-6 февральдә Казанда Алдынгылар Советларының республика слёты узды. Республиканың һәр районыннан Хәрәкәтнең барлык 12+1 юнәлеше буенча лидерлар һәм Алдынгылар җирле Советлары рәисләре җыелды. Алар мөстәкыйль рәвештә юл картасын эшләделәр, Хәрәкәт үсешенең төп нокталарын һәм киләсе елга планнарны билгеләделәр.

Слёт катнашучылары өчен белем бирү буенча бай программа әзерләнгән иде: мастермайндлар, иң яхшы эш тәҗрибәләрен өйрәнү, форсайт-сесияләр һәм башкалар. Хәрәкәтнең район кураторлары өчен дә аерым активлык булды.

Слётка килгән һәркем төбәк Алдынгылар Советының (республика дәрәҗәсендәге балалар үзидарәсенең яңа органы) ачык утырышында катнашты. Йомгак ясап, яшүсмерләр үзләре түбәндәгеләрне расладылар:
- Хәрәкәт Уставына үзгәрешләрне;
- Советның яңа секретарен;
- Советның яңа әгъзаларын, аерым алганда, «Туган тел һәм мәдәният» юнәлеше лидерын һәм «Зур Тәнәфес» («Большая Перемена») төбәк командасы вәкилен.

Слёт «УРАМ» экстрим-паркында тәмамланды. Анда Алдынгылар хәрәкәте белән хезмәттәшлек буенча Татарстан Республикасы Рәисе каршындагы Координация советының киңәйтелгән утырышы булды. Анда Алдынгылар хәрәкәте идарәсе рәисе Марат Закиров, ТР Премьер-министры урынбасары Ләйлә Фазлыева, ТР Рәисе ярдәмчесе, Татарстанда Алдынгылар хәрәкәте җитәкчесе Тимур Сөләйманов катнашты. Утырыш вакытында Хәрәкәттә катнашучылар 2023 елда гамәлгә ашырылган проектларны тәкъдир иттеләр, шулай ук яңа инициативалар турында сөйләделәр: булачак балалар банк картасын тәкъдим иттеләр, Пушкин картасы балалар дирекциясен төзергә тәкъдим иттеләр, Татарстан балалар бакчаларында «Чиста уеннар»ны сынау рәвешендә эшләтеп җибәрүне сорадылар.

19-27 апрель көннәрендә республиканың алты районында «Алга! Киттек!» форумы узды. Анда бөтен Татарстаннан 2632 алдынгы катнашты.

Барлык форумнарда өч белем бирү мәйданчыгы эшләде:

• «Космик очрашулар»
Катнашучылар төрле темалар буенча мини-лекцияләрдә булдылар

• «Каз юлы»
Һәр район үзенең тематик мастер-классын оештырды

• «Ачык космос»
Беренчел бүлектәге балалар үзләренең иң яхшы тәҗрибәләре белән уртаклаштылар

Форум Казанда Татарстанда Алдынгылар хәрәкәтенең өстенлекле проектларына багышланган күргәзмәне ачудан башланды. Болар: пилот балалар бакчаларында эшләү, Хәрәкәтнең җәйге сменаларын эшләтеп җибәрү, Алдынгылар балалар банк картасының анонсы, ә тагын Татарстан өчен уникаль булган «Туган тел, милли мәдәният һәм гореф-гадәтләр» юнәлеше буенча проектлар һәм башкалар. Күргәзмә белән Татарстан Республикасы Рәисе Рөстәм Миңнеханов һәм Казан мэры Илсур Метшин танышты.

Форумнарда Татарстанның беренчел бүлекчәләренең иң яхшы командалары һәм җирле бүлекләрнең барлык командалары җыелды. Соңгылары районда Хәрәкәтне үстерү өчен әһәмиятле урыннар буенча үз видеоролик-экскурсияләрен тәкъдим иттеләр һәм үзләрен иҗади яктан күрсәттеләр. Балалар үзләренең җирле бүлекчәләре, остазлары, юнәлешләр лидерлары, традицияләр һәм кыйммәтләр турында сөйләделәр.

Һәр форумда «Команда Первых – Алдынгылар» республика премиясе лауреатларын бүләкләделәр. Жюри җиңүчеләрне «алдынгылар» өчен биш номинация буенча билгеләде һәм җирле бүлекчәләрне аерым бәяләде. Ә «Ел остазы» махсус номинациясендә Хәрәкәттә катнашучылар белән һәрвакыт янәшәдә булучыларны: юнәлеш бирүчеләрне һәм ярдәм итүчеләрне бүләкләделәр.

1 июньдә Казан Кремле территориясендә «Ялкын» журналының 100 еллыгына багышланган «Ялкын Фест»балалар-яшүсмерләр фестивале узды. 35 меңнән артык кеше Татарстанның популяр артистлары, блогерлары һәм диджейлары чыгышларын карарга килде, милли костюмнар кигән дефиледә, балалар этно-маркетында һәм башка мәйданчыкларда булды.

Казан Кремле территориясе бер көнгә Балачак шәһәренә әверелде. Алдынгылар  мәйданында төп сәхнә урнашкан иде. Анда диджей BubbleGum B. aka Aaron Voodoo, артист Раил Арысланов, җырчы «ДЫШАТЬ» (Гөлназ Шакирова) һәм Татарстанның башка күп кенә вокаль һәм бию ансамбльләре чыгыш ясады. Кече сәхнәдә рэп-импровизация һәм диджейлыкка өйрәттеләр, милли костюмнарда дефиле үткәрәләр, ә «Ялкын» сәхнәсендә барган барлык хәрәкәтләр журналга һәм аның дустанә проектларына багышланган иде.

Фестивальнең кунагы - Татарстан Рәисе Рөстәм Миңнеханов. Ул «Ялкын» журналының 100 еллыгына багышланган күргәзмә белән танышты, басманың июнь чыгарылышын әзерләгән Алдынгылар хәрәкәтенең балалар редакциясе һәм фестивальнең калган катнашучылары белән аралашты.

Фестивальдә башка интерактив мәйданчыклар да күп иде. Иҗат зонасында балалар «Манга» стилендә татар фольклоры персонажлары турында комикслар ясадылар. Осталар урамында теләгән һәркем милли орнаментлы әйберләр иҗат итәргә өйрәнде. Хәрәкәтле уеннар яратучылар үзләрен Татарстанның милли уеннарында сынап карады, команда турнирларында һәм башка күп уеннарда катнашты. Фестиваль дәвамында ачык һава астында тавышы урамга чыгарылган подкастлар студиясе эшләде. Шәһәр халкы да, шулай ук туристлар һәм республика блогерлары да интервью бирделәр һәм бәйрәмнән алган хисләре белән уртаклаштылар.

Кояш батканда фестивальнең төп сәхнәсендә заманча укылыштагы милли мотивлар белән дискотека узды, анда яшүсмерләр үзләре ди-джей булды.