Быел көз республиканың барлык мәктәпләрендә балалар үзидарәсенең яңа лидерлары сайланды

Республикада ел саен үткәрелә торган Алдынгылар Советлары рәисләрен сайлаулар башланды. Беренче чиратта алар мәктәпләрдә беренчел бүлекләр дәрәҗәсендә узды. Фикердәшләр командасы белән рәисләр даими нигездә файдалы вакыйгалар уйлап табачак һәм аларны тормышка ашырачак, акцияләр башлап җибәрәчәк һәм башка кызыклы эшләр башкарачак.

Алдынгылар Советы – ул балалар үзидарә органы, аңа һәр сыйныфтан вәкилләр, шулай ук мәгариф оешмасы базасында эшләп килүче балалар һәм яшьләр оешмаларында, отрядларында, түгәрәкләрендә, клубларында һәм секцияләрендә катнашучылар керә ала.

2024 елда сайлау кампаниясе Татарстанның 1200 дән артык уку йортында узды. Хәрәкәттә катнашучылар, сайлау процессында катнашу күнекмәләрен алып, сайлау алды штабларын төзеделәр, дебатлар оештырдылар һәм сайлаулар үткәрделәр.

Шулай ук, рәис вазифасына кандидат булу өчен, «Башка эш» («Другое дело») платформасында махсус марафон узарга һәм кандидатны хуплаучы 10 фикердәштән гыйбарәт команда җыярга кирәк иде. Марафонда махсус биремнәр бар иде: мәсәлән, сайлау алды плакатын ясау, үзең турында клип төшерү, игелекле эш эшләү, дебатларда катнашу һәм сайлау алды программасы белән сайлаучылар белән уртаклашу һ.б. Аларны үтәп, һәр кандидат яхшы сайлау алды кампаниясен әзерли алды. Балалар үзидарәсенең яңа лидерлары мәктәп яки көллият укучылары арасында яшерен тавыш бирү юлы белән билгеләнде.

Исегезгә төшерәбез, Алдынгылар Советына кергән балалар һәм яшүсмерләр бергәләп чаралар үткәрә, инициативалар тәкъдим итеп, аларны алга этәрә ала. Ә остазлары ярдәмчеләр һәм арадашчылар булып тора. Бер яктан, Советлар укучыларга мәктәп диварлары эчендә үзләрен күрсәтергә ярдәм итсә, икенче яктан – яшүсмерләр һәм балалар белән уртак тел табарга булышып, мәктәп белән идарә итү өчен көчле терәккә әверелә.