«Ура, авылга» татар лагеренда 1000 артык бала катнашты

Июль аенда Татарстанның 5 районында «Ура, авылга» пректы тәүге эшен башлап җибәрде. Алдынгылар хәрәкәте оештырган бер атналык түләүсез көндезге лагерь республиканың авыл җирлекләрендә узды. Әлки, Апас, Арча, Балтач һәм Теләче районнарындагы 15 авыл 6-17 яшьлек 1000 якын бала һәм яшүсмерне үзләрендә кабул итте.

Көн саен көндез (9:00 алып 13:00 кадәр) һәм кичен (17:00 алып 21:00 кадәр) махсус укулар узган әйдаманнар лагерьда катнашучылар өчен төрле чаралар үткәрделәр. Аларда я шушы авыл җирлекләрендә яшәүче балалар белән яшүсмерләр, я анда туганнары яки дуслары булганнар катнашты.

Сменаларда алар төрле интерактив форматларда туган телне, мәдәниятне һәм традицияләрне өйрәнделәр: әйтик, саф һавада татар халык һәм интеллектуаль-күңел ачу уеннары, экскурсияләр, кино кичләре, районның кызыклы шәхесләре (хореограф Лилия Баширова, рәссам Илсөяр Вәлиев, Казан халык сәнгать кәсепләре техникумының җитешетерүгә өйрәтү остазы Гөлия Сафина) белән очрашулар, мастер-класслар, традицион милли көрәшләр, дискәтүкләр һәм башкалар.

Мәсәлән, Әлки районында балалар милли бизәкләр белән калфаклар һәм агач савыт-саба ясарга һәм мендәрләр чигәргә өйрәнделәр, Апаста – баянда уйнарга һәм татар халык җырларын җырларга, шулай ук чишмәгә туристларча поход ясадылар, Теләчедә – «Туган авылым» музей комплексында экскурсия тыңладылар, үзләренең шәҗәрәләрен ясадылар һәм татар коймакларын пешерү буенча аш-су мастер-классында катнаштылар.